أخبار عاجلة
الرئيسية » إبداعات شبابية » سمحتو فالعيون وغبنتونا وقدام ليهود بهدلتونا
سمحتو فالعيون وغبنتونا وقدام ليهود بهدلتونا

سمحتو فالعيون وغبنتونا وقدام ليهود بهدلتونا

العيون سيتي / عبد الله بحوصي
بسم الله الرحمان الرحيم .

قصيدة زجلية بقلم عبدالله بحوصي .

بعنوان
     سمحتو فالعيون وغبنتونا وقدام ليهود بهدلتونا

في واحد اليوم مشيت انا حواس . . . . وقاصد للفيلاج كيف امولف

قهوة المجدوب نشرب فيها كاس . . . . بالنعناع بنين والكاس امحرف

لحباب ولصحاب صغير وتراس . . . . في قبل المغرب ل ثمة تهدف

انا غادي وشفت ما شافت الناس . . . . طوبيس جديد بالجاج مغلف

يمشي فالشاريع يتمشى بكياس . . . . قدامه ضباط الامن اتخلف

في وسطه قوم ماهم ك ذالناس . . . . هاذ الشي واقع مانيش نهترف

. . . . . . . . . . . . . . . . . . . . . . . . . . . . . . . . . .

سولت الميلود وانا في حيرة . . . . وجاوبني فالحين يضحك بتبسام

يهود المغرب جابتهم غيرة . . . . وجاو البلاد يتفكرو   لرسام

مازالت ديورهم تشهد بالجورة . . . . عشرناهم سنين كذا من اعوام

مازالت شيوخنا تشهد بالسيرة  . . . . حياة اليهود تمشي بانتظام

حياة  اليهود  راها مشهورة . . . . يعرفهم الكل في هاذ العالام

يعيشو فالخير عيشة ميسورة . . . . ويخدمو الوطن ماهمشي ظلام

لي كذبني ثمة يضرب دورة . . . . ويشوف بعينيه ما قال النظام      -الشاعر-

تصيب اسرائيل مغسولة خضرة . . . . وردة في بستان يسقيها خدام

تصيب شواريع تعجب فالنظرة . . . . تمشي فيها طول مكاين زحام

تعجبك طرقان مكاين غبرة . . . . اشارات المرور مرشومة ترشام

تعجبك ديار بسقفها حمرة . . . . طابعها قرمود يسكنه حمام

تعجبك جرادي تجلب فالنظرة . . . . زربية عربية مرقومة ترقام

مدارس ملاح للبز لي يقرا . . . . ومعاهد كبار تخرج غي الحكام

تعجبك الناس من راجل مرة . . . . مصقولين جداد كي حجرة رخام

مكاين عياط مكاين هدرة . . . . حركة السير تمشي بانتظام

مكاينش الغش مكاين غدرة . . . . والتاجر معقول تحسبه إمام

ناس المناصيب تدفعهم غيرة . . . .يخدمو لبلاد خدمة على ليام

. . . . . . . . . . . . . . . . . . . . . . . . . . . . . . . .

صبيطار اليهود غي تشوفه تبرى . . . .ثمة شي علجات تشفي من لسقام

وصبيطار العيون داروه في حفرة . . . . تشوفه من البعد توجعك لعظام

شبهتو بالدار لي مهجورة . . . . سكناته موكة تبوم فيه بوام

خلعت السياح كي فرت فرة . . . . حسبوها جن ساكن فالاهرام

حسن الاستقبال داوه بالكثرة . . . . تعرضهم ناموس كبة دار ظلام

خارج من قادوس والريحة مرة . . . . جردة المامون يسقيها بتمام

العلجة بالقرس رجعت غي هبرة . . . . يقبلها ناموس بالعز وتكرام

كي دخلت لعيون صابتها عبرة . . . . تمشي فالشاريع وتخمم تخمام

تمشي فالشاريع تزلق فالخضرة . . . . قدام المرشي مطروحة عرام

زادت شي خلفات عند الجزارة . . . .وبقات تتعجب مسكينة مدام

الدم مكبد في طرف المنجورة . . . . و ريحة البودان تزيده تنسام

لحمير تنهك ولعجاجة صفرة . . . . وحركة السير تتمشى بالعام

لعياط ولغوات  و كثرة الهدرة . . . .شلحة وعرب ماتفهم كلام

.. . . . . . . . . . . . . . . . . . . . . . . . . . . . . .
رشقت الليهود وعجبهم التحواس . . . . في وسط الفيلاج لوسخ امستف

من كثرة لحموضة داخلهم الراس . . . . شي ريحة ثمة فالعنق اتجيف

لكواغط والميكة غطاو كل بلاص . . . . وروايح الحوت بيها تتكيف

ابغاو تصاوير عجبوهم لقواس . . . . تبقى ذكريات ليهود الخلف

جبرو كل قوس تحته العساس . . . . شمكار ومهبول بالوسخ ايعيف

. . .. . . . . . . . . . . . . . . . . . . . . . . . . . . . . . . . .

قالو فالشاريع نضربو دورة . . . . ونتفكرو زمان كي دازت ليام

صابوه متقب حفرة حذا حفرة. . . قتلهم السوكوس وجعوهم لعظام

غرب المغرب بالشمش الصفرة . . . والشاريع الزين طاح عليه ظلام

قالو نرتاحو من هاذ العبرة . . . .ونشوفو لوتيل فيه مركد وطعام

صابوها خالية مكاين حجرة . . . وروحو بالجوع على عية لغشام

صابو فالطريق خنادق كبيرة . . . مشروع الواد يتوقف بالعام

محاصر العيون يمين ويسارة . . . طبعوه قواديس تحطو بالعرام

الطوبيس الجديد  اترك بالغبرة  . . . والعلجة الزعرة كحالت بالتخمام

حلفو باليمين لا رجعوا مرة . . . . وكواو رجليهم بالكي والوشام

الشاعر معروف مولى ذالفقرة . . . عبدالله بحوصي كاتب ذو لنظام

نختم كلامي في هاذ الخطرة . . . .بصلاة الرسول نصلي بالدوام

صلى الله عليك يازين البشرة . . . والسلام عليك يا طيب لكلام

تمت بعون الله
14.05.2015
عبدالله بحوصي

اضف رد

لن يتم نشر البريد الإلكتروني . الحقول المطلوبة مشار لها بـ *

*

إلى الأعلى